Special Olympics Galicia, asociación dedicada á promoción das persoas con discapacidade a través do Deporte e do Ocio, organizou un ano máis os Xogos Autonómicos de Deportes Minoritarios na cidade da Coruña coa colaboración de FADEMGA FEAPS GALICIA e da Asociación coruñesa ASPRONAGA. O sábado 18 de marzo a cidade coruñesa volcouse cos deportistas de Special Olympics Galicia que competiron nas instalacións do Pazo dos Deportes de Riazor nas modalidades de petanca, tenis de mesa e badminton demostrando que existe un excelente nivel nestes deportes en Galicia.
Os Xogos Autonómicos tamén contaron con probas adaptadas para as persoas con discapacidade intelectual que teñen máis problemas á hora de realizar movementos físicos. Estas probas consistiron en salto dinámicos, rodar, raquetas e pelotas, bowling, tiro á porta e lanzamento de precisión.
O evento contou coa presenza de parte da corporación municipal da Coruña; así como co Presidente de Special Olympics Galicia, Eladio Fernández Pérez; e a Delegada provincial e integrante da corporación municipal Margarita Vázquez Veras, que dirixiron unhas palabras aos participantse momentos antes de que o Concelleiro de Deportes da Coruña, Esteban Mª Lareo Fernández, procedera á inauguración oficial da undécima edición destes Xogos Autonómicos.
O evento deportivo contou tamén cunha exhibición do equipo de ximnasia rítmica do Club Santiago Apóstol da Coruña, que demostrou porqué é o actual Campión de España na súa modalidade. O equipo coruñés gañou recentemente o Campionato de Ximnasia Rítmica celebrado na Coruña pola FEDDI (Federación Española de Deportes para Persoas con Discapacidade Intelectual).
A celebración destes Xogos seguiu o ceremonial das celebración das Olympiadas. Os deportistas das 22 asociacións participantes desfilaron polas instalacións antes do desfile das bandeiras de Galicia, A Coruña e de Special Olympics. Posteriormente un deportistas da Asociación Aspronaga leu o lema dos deportistas de Special Olympics “Quero gañar, máis se non o acado, deixádeme ser valente no intento”.
O número de participantes nos Xogos Autonómicos de Deportes Minoritarios deste ano 2006 aumentou con respecto ao pasado ano de 542 persoas a 574 nesta nova edición. As asociacións de toda Galicia que participaron foron un total de 22 asociacións das catro provincias galegas que desplazaron a un total de 346 deportistas con discapacidade intelectual e 102 adestradores á Coruña. Nos Xogos tamén colaboraron un total de 85 voluntarios e 41 persoas entre integrantes da organización e persoal de Cruz Vermella, Protección Civil, árbitros, etc… A participación nos Xogos foi de 574 persoas entre deportistas, adestradores, voluntarios e integrantes da organización.
Nesta nova edición cabe destacar un aumento da participación en certas disciplinas como a PETANCA onde a participación o pasado ano era de 48 deportistas e este ano ascendeu a 92. De feito este ano dende Special Olympics España organizouse o primeiro Encontro de Petanca e Tenis de Mesa en Zaragoza celebrado en novembro do 2005 e no que Special Olympcis Galicia participou con éxito. Os deportistas de Special Olympics Galicia lograron cinco medallas de ouro, dúas de prata e outras dúas de bronce.
